മൂന്നാം നിലയുടെ ജാലകക്കാഴ്ചയിൽ
ദൂരെ തെളിയും വരാന്തയിലൂടെ
അസ്വസ്ഥരായി നടക്കുന്ന ആളുകൾ
സ്ഥിരം രാത്രിക്കാഴ്ചതന്നെയെങ്കിലും
ആകാശത്തിലെ ഏത് പാളിയിലൂടെയാണ്
അവരുടെ നടത്തം എന്ന്
ഇതുവരെ തിട്ടപ്പെടുത്താനായിട്ടില്ല.
***
ഏകാന്തതയുടെ കാട്ടുതീയണയ്ക്കാൻ
ഒരു പെഗ്ഗ് കൂടി ഒഴിച്ചു, കാട് പുകഞ്ഞു
ഓർമകളെ പുതപ്പിച്ചു കിടത്തി, മുറി വിട്ട്
പുറത്തേക്കിറങ്ങി,
ചെറുമഴ നനഞ്ഞ് പാതിരാവിൽ
ഒഴിഞ്ഞ തെരുവിലൂടെ നടന്നു
പകൽതിരക്കിൽ നുരയും ചന്തയിലൂടെ എന്നപോലെ
ആളുകളെ തട്ടാതെ, നിരത്തിവച്ച
സാധനങ്ങളിൽ മുട്ടാതെ ഒഴിഞ്ഞുമാറി...!
2
ഒരു പട്ടിയുണ്ട്
കിട്ടിയ അടിയിലൊന്നും ഒതുങ്ങാതെ
ഉറക്കത്തിൻ
മെരുങ്ങാപ്പെരുവഴിയിലൂടെ
രാവു മുഴുവൻ ഓരിയിട്ടോടുന്നു.
ഒരു കാക്കയുണ്ട്
കൂട്ടിലേക്ക് ആരൊക്കെയോ
കല്ലെറിയുന്നൂ എന്ന്
രാത്രിയെ പരാതിയാൽ നിറയ്ക്കുന്നൂ.
വേറൊരാളുണ്ട്,
വായുവിൽ പറന്നുനിന്ന്
ചിലച്ചും ചിറകിട്ടടിച്ചും
ഇരുട്ടിനെ വെല്ലുവിളിക്കുന്ന
ഉറക്കമില്ലാത്ത ഒരുവൾ.
3
ശല്യക്കാരായ ഓർമകളെയൊക്കെ
ആട്ടിപ്പായിച്ച്
കൂടു വിരിച്ച് കാത്തിരിക്കുന്നു
വിട്ടുപോയ ഉറക്കത്തെ പാട്ടിലാക്കാൻ.
