ആരും തിരിച്ചറിയാത്തൊരിടം

അതായിരുന്നു അയാൾക്ക്

ഇറങ്ങേണ്ട സ്റ്റേഷൻ.

കോളറിനുള്ളിലെ

തയ്യൽക്കടപ്പേരോ

ഇടംകൈയ്യിലെ തീപ്പൊള്ളൽ പാടോ

ഒറ്റു കൊടുക്കരുതെന്ന് കരുതി

ദൂരം ദൂരമെന്നയാൾ കിതച്ചു കൊണ്ടിരുന്നു

അറിയാത്ത ഒരു നാട്ടിലെ

അടിയൊഴുക്കുള്ള ഏതോ നദി

അയാളിലൂടെ കുതിച്ചു.

എല്ലാ ഭാരവുമൊഴിഞ്ഞു

ജലപ്പരപ്പിൽ തൂവലായി

മാറുന്ന ദേഹമോർത്തയാൾ

കലങ്ങിത്തെളിഞ്ഞു

തീവണ്ടിയിൽ

മരിച്ചവരും

ജീവനുള്ളവരും

അറുത്തിട്ട മരത്തിൽ നിന്നും

കൊത്തിയും ചീകിയും

ഒരാളൊരു ശില്പം കണ്ടെടുത്തു,

മുറിഞ്ഞു പോയ

ഇലകളും പൂക്കളും

അമ്പരന്നു നോക്കി,

പാഞ്ഞു കേറിയിറങ്ങിയ

ഉരഗങ്ങൾ, ജന്തുക്കളും.

കൊത്തിയടർത്തിയ ചീളുകൾ,

വേർപെട്ടു പോയ ചില്ലകൾ,

മുറിഞ്ഞു മുറിഞ്ഞടർന്ന

ഉടലംശങ്ങൾ.

എവിടെയായിരുന്നു ഒളിച്ചു പാർത്തത്?

ശില്പത്തിൻ വിടർന്ന കണ്ണുകൾ നോക്കി

പതിയെ ചോദിച്ചു പക്ഷികൾ

മാനം നോക്കിക്കിടന്നു,

മണ്ണിൽനിന്നടർന്നു പൊട്ടിയ...