ishai

രണ്ടു കവിതകൾ

മൊഴിമാറ്റം: പി രാമന്‍

3.കി.മീ

ആ നാട്ടിലേക്ക്
ഈ വഴി 3 കി.മീ. എന്നു
കാട്ടിക്കൊണ്ടു നിൽക്കുന്ന
വഴിചൂണ്ടിക്കാലിന്
ആ നാടൊന്നു കാണാൻ
ആശയുണ്ടായി, ഒരുനാൾ.

ആശയടക്കാനാവാതെ
അത് നടക്കാൻ തുടങ്ങി.

3 കി.മീ എന്ന തന്നെ
പിന്തിരിഞ്ഞു നോക്കിക്കൊണ്ട്
അകന്നകന്നു പോയി
ആ നാട്.

വളർന്നാലും നടന്നാലും

എന്റെ തോട്ടത്തിൽ
ഒരു റോസാപ്പൂവ്.
അതിനുള്ള മുടി
വളരെ ദൂരെയെങ്ങോ.

റോസാപ്പൂവിൻ സ്വപ്നത്തിൽ മുടിയും
മുടിയുടെ സ്വപ്നത്തിൽ റോസാപ്പൂവും
കൂടെക്കൂടെ വന്നു മറഞ്ഞു.

മുടിയെക്കുറിച്ചോർത്തോർത്ത്
പൂവു കറുത്തു വന്നു.
മുടി ചുവന്നും വന്നു.
റോസാപ്പൂവിനു നടന്നു ചെല്ലാനോ
മുടിക്കു വളർന്നു നീളാനോ കഴിഞ്ഞില്ല

വളർന്നാലും നടന്നാലും
തമ്മിൽ ചേരാൻ
ഒരിക്കലുമവയ്ക്കു കഴിയുകയുമില്ല.