vmgirija

മഥുര ബാംഗ്ലൂരിലോ യു.എസ്സിലോ ആണ്

മുറിതോറുമിറങ്ങിക്കേറീ
അവിടില്ലാ നീയെന്നാലും..
അലമാര തുറന്നുമടച്ചും
ജനലക്കലിരുന്നുമെണീച്ചും
ചെവിയോര്‍ത്തും കണ്‍കൂര്‍പ്പിച്ചും
സമയം പോയ്, ഒരുപാടിപ്പോള്‍.
ഇലചിതറും മുറ്റത്തേക്കു-
മകത്തേക്കും മഴയത്തേക്കും
മഴയിറ്റും പ്ലാവിന്‍ചോട്ടിലു-
മിറയത്തും കേറിയിറങ്ങീ.
വെയിലത്ത് കിടന്നുരുളുന്നു
വരയന്മാര്‍ പൂച്ചക്കുട്ടികള്‍
അവരോടു കലമ്പാന്‍, ദേഷ്യം
മുനകൂര്‍പ്പിച്ചെത്തും നീയെ-
ന്നൊരു നിമിഷം കാത്തൂ..
ചോരയില്‍ ഒരു വേദന
തിരയിളകുന്നു.

തിരയായിസ്സിരകള്‍ തോറും
പടരുന്നു മറിവിക്കോര്‍മ്മ.
മൃദുലോഹം കൊണ്ടു ഖനിച്ചോ
ചുടുചോരച്ചോല നനച്ചോ
കടലായ് മൃതിയോളം പ്രാണന്‍
തലതല്ലിച്ചെന്നു കവര്‍ന്നോ
തിരികെ വരുമെങ്ങനെ നീ
ഞാന്‍ കരയുന്നു മുലപ്പാലെല്ലാം
തനിയുപ്പായ് വറ്റിയപോലെ.
നനുപുല്ലിന്‍ പച്ചപ്പട്ടില്‍
തിരിയൊച്ചയുമില്ലാതേതോ
രഥമുരുളുന്നുണ്ടതു പോകും
വഴി ലോകാലോകം പോലെ-
ത്തെളിവാര്‍ന്നുമിരുട്ടാര്‍ന്നു
ചുരുള്‍ ചുരുളായിപ്പുകയും ചൂടും
നറുപാല്‍പ്പുഴയും പിണയുംപോല്‍
ഒഴുകുന്നതു മഥുരയിലേക്കോ?
ഇവിടെയിരുന്നതു കാണാം,
പുല്ലുകള്‍, വഴികള്‍, മരുതുമരങ്ങള്‍;
മൈക്കണ്ണിപ്പൈക്കൂട്ടം, പാല്‍-
ക്കിണ്ണങ്ങള്‍ വെണ്ണപ്പാത്രം.
മണ്‍തരികള്‍ മണക്കും വായയി-
ലില്ലാത്തവയില്ലെന്നമ്മക്കു-
ള്ളലിവും വിസ്മയവും പാല്‍-
ക്കണ്ണീരും ദാമോദരവും
എന്നാലും പോകണമെന്നോ
മഥുരക്കീ ചെറുബാല്യങ്ങള്‍,
കാണാമത് തേര്‍ക്കൊടിയാട്ടം,
പാളത്തില്‍ വണ്ടിച്ചക്രം,
ദൂരേയൊരു പുഷ്പകഘോഷം
വേരുകള്‍, പൊട്ടും ശബ്ദംപോല്‍
മഴയത്തുമിരുട്ടത്തും പൊന്‍വെയിലത്തും
ധനുമാസത്തിന്‍ മൃദുമഞ്ഞിലുമ-
മ്മക്കോര്‍മ്മയില്‍ മഥുരക്കുള്ളൊരു
വഴി മാത്രം.
മഥുരക്കേ പോകണമെന്നോ
ചുരുള്‍മുടി മുഖചന്ദ്രനെ മൂടും
വിരലാലേ മാറ്റിത്തെളിയും
മധുരിക്കും കൗമാരങ്ങള്‍?
കുന്നിന്‍കുട കൈയ്യിലെടുത്തും
പുഴവെള്ളം മധുരിപ്പിച്ചും
പൂക്കള്‍ കോര്‍ത്താറ്റിന്‍ വക്കില്‍-
പ്പൂത്ത മരം പോലെ നിന്നും
കരയിച്ചും കിക്കിളിയാക്കി-
ചിരിയിച്ചും കഴിയേണ്ടുന്നോര്‍
പോകണമവരെന്നോ മഥുരയില്‍
വേഗതതന്‍ മായാപുരിയില്‍?
...
മക്കളെ കൗമാരത്തിലേ പിരിയുന്ന കേരളത്തിലെ അമ്മമാരുടെ ഉള്ളിലെ മഥുരയാണ് ഇവിടെവിടെയോ ആവാം.