kalyanji

മണലുള്ള ആറ്

മൊഴിമാറ്റം: പി രാമന്‍

ഏട്ടത്തി മരിച്ചിട്ട്
ഏറെക്കാലമായി.
അവരുടെ മര അലമാരയിൽ
വേറെന്തോ തെരയുന്നതിനിടയിൽ കിട്ടി,
ഏട്ടത്തിയുടെ കാപ്പിക്കളർ സോപ്പുപെട്ടിയും
അതിനുള്ളിൽ ലൈഫ്ബോയ് സോപ്പുതുണ്ടും.
ഏത് ആറ്റിൽ കുളിക്കുമ്പോൾ
വഴുതി വീണതോ,
എല്ലായിടത്തും മുള്ളുമുള്ളായി
ഒട്ടിയ മണൽ, സോപ്പിൽ.
അറിയാതെ പോയല്ലോ 
ഇത്രകാലവും
മര അലമാരക്കുള്ളിലൂടെ
മണലുള്ള ഒരു ആറ്
ഒഴുകിക്കൊണ്ടിരുന്നത്.