sukumaran

തമ്പുരാനേ അങ്ങയുടെ ആജ്ഞ

മൊഴിമാറ്റം: വി എം ഗിരിജ

തമ്പുരാനേ
അങ്ങയുടെ കല്പന പോലെയാണ്
എല്ലാം നടന്നത്.

നാവു മുറിച്ചു;
മൊഴി മറഞ്ഞു.
കാലുകള്‍ വെട്ടിമാറ്റി;
മണ്ണ് നഷ്ടമായി.
കണ്‍കള്‍ പറിച്ചു
മാനം മറഞ്ഞുപോയി.
ലിംഗങ്ങള്‍ ഛേദിച്ചു
യോനികള്‍ പിളര്‍ന്നു
തലമുറപ്പിറവികള്‍ നിലച്ചു

ആ വന്‍ദുരന്തത്തെ അതിജീവിച്ച
ഓരോ തുള്ളിച്ചോരയും
മണ്ണില്‍ തെറിച്ചു;
തെറിച്ച മണ്ണില്‍നിന്ന്, ഉണ്ടായി
പുതുജീവന്‍.
നമ്മുടെ കണക്കവിടെ തെറ്റി.
അതുകൊണ്ടു തമ്പുരാനേ,
നിന്റെ കല്പനകള്‍ പുതുക്കി നിറവേറ്റപ്പെട്ടു.

വിശന്നുകരയും ശിശുക്കളുടെ ചുണ്ടുകള്‍ക്കും
വറ്റിയ മുലക്കണ്ണില്‍ പൊടിഞ്ഞ
ചെങ്ങി വിളര്‍ത്ത പാല്‍ത്തുള്ളികള്‍ക്കും ഇടയില്‍
മരണത്തിന്റെ ക്രൂരഹസ്തങ്ങള്‍ കടത്തിവിട്ടു.
മുലകള്‍, വലിച്ചു പിഴുതു.
വിടരും ചുണ്ടുകള്‍, കശക്കിപ്പറിച്ചു.

ഇണതേടുന്ന
ഉദ്ധൃതലിംഗങ്ങള്‍ക്കും
അലിയുന്ന യോനികള്‍ക്കും ഇടയില്‍
ഉല്ലസിക്കാന്‍, നാം സമ്മതിച്ചു
യൂണിഫോമിട്ട ചെകുത്താന്മാരെ.
പുണരാന്‍ കൊതിക്കെ, തടഞ്ഞും
പുണരാന്‍ നിര്‍ബ്ബന്ധിച്ചും
ഉടലിന്റെ സംഗീതം തകര്‍ന്നു!

വയസ്സന്‍ സിംഹങ്ങള്‍ക്ക് പൈതങ്ങള്‍
ചെറുപുലികള്‍ക്ക് വയസ്സര്‍,
അതെ, നഗരം വൃത്തിയാക്കപ്പെട്ടു

തമ്പുരാനേ, അവിടത്തെ ആജ്ഞപ്രകാരം
നമ്മളല്ലാതെ മറ്റാരുമില്ലാത്ത
ഒരു ഭൂമി പിടച്ചടക്കി

ഒരു പിടി മണ്ണ്, ഒരു തുള്ളി ചോര
ഇവ തുല്യം, കനത്തില്‍
തൂക്കത്തില്‍, വിലയില്‍.

ഇതല്ലേ തമ്പുരാനേ, ചരിത്രം?