gnanakkoothan

ചതുര അലകള്‍

മൊഴിമാറ്റം: പി രാമന്‍

കൊടൈക്കനാൽ തടാകത്തിൽ
തന്റെ വളഞ്ഞ കഴുത്ത് ആഴ്ത്തിയെടുത്തു
ഒരു വാത്ത്.
വളയം വളയമായ് അലകൾ പരന്നു.
അതുപോലുള്ള അലകൾ കാണാനാഗ്രഹിച്ച്
ഈ കുളത്തിൽ ഞാനൊരു കല്ല് വീശിയെറിഞ്ഞു.
ചതുരം ചതുരമായ് അലകളൊഴുകി വന്നു.
ആരെയെങ്കിലും വിളിച്ച്
അലകൾ ചതുരം ചതുരമായൊഴുകുന്നതു
കാണിച്ചു കൊടുക്കാമെന്നു വെച്ചാൽ
ആരതു വിശ്വസിക്കാൻ?
എന്തായാലും ഒരു കൂട്ടുകാരനെച്ചെന്നുകണ്ട്
ചതുര അലകൾ കാണാൻ വിളിച്ചു.
അലകൾ ചതുരമാവുന്നത് അതിശയം തന്നെ,
അതു ഞാൻ നാളെ വന്നു കാണാം എന്നവൻ.
എനിക്കും ഒരു സംശയം,
സത്യത്തിൽ അലകൾ 
അങ്ങനെത്തന്നെയായിരുന്നോ.
കുറഞ്ഞ പക്ഷം രണ്ടു തവണ സംഭവിക്കണം അല്ലേ,
എന്തും വിശ്വസിക്കാൻ?