carpenter

ഖഡ്ഗപുരാണം

മൊഴിമാറ്റം: അന്‍വര്‍ അലി

ഉറുമ്പിന്റെ
കഴുത്തരിയാനായി
ചന്തയില്‍നിന്നൊരു വാള്‍ വാങ്ങിവന്നു

അത്
ദിവസേന
ഉയരങ്ങളും
പരപ്പുകളും
മിന്നല്‍വേഗത്തോടെ
ശീലിച്ച്
ഉറുമ്പുകളെ കൊന്നുകൊണ്ടിരുന്നു

കഴുത്തിനു പുറമേ
ബധിരകര്‍ണ്ണങ്ങളെ
അന്ധനയനങ്ങളെ
കുറിയ കൈകളെ
ഞൊണ്ടിക്കാലുകളെ
കുടലു ചൂഴുന്ന ഉദരത്തെ
പിന്നിലേക്കൊഴുകുന്ന
രക്തക്കുഴലുകളെ
എവിടെയും വളയുന്ന
നട്ടെല്ലിനെ
അങ്ങനെയങ്ങനെ
അത്
തന്റെ കൊലപ്പട്ടിക
പെരുപ്പിച്ചുകൊണ്ടിരുന്നു

അഴുകാനായി
ഉപ്പുചാക്കില്‍ ഇട്ടുനോക്കി

വിശക്കുന്ന വന്‍പുലിക്കൊപ്പം
കൂട്ടിലെറിഞ്ഞു

വിഷജന്തുക്കളുടെ
കിണറ്റില്‍ തള്ളി

ഒന്നിനും വഴങ്ങാത്ത അത്
'നിന്റെ നിലനില്‍പ്പിനെ കൊല ചെയ്യാതെ
എന്റെ മുഷ്ക് ഞാന്‍ വിടില്ല'
എന്ന് ചിരിച്ചു.