ishai

ഒരുകോടി നൂറ്റെട്ടു ദുഃഖങ്ങള്‍

മൊഴിമാറ്റം: സന്ധ്യ എന്‍ പി

ഒരുകോടി നൂറ്റെട്ടു ദുഃഖങ്ങളുണ്ടീ ലോകത്ത്
ചരിത്രം, തത്വചിന്ത, സാഹിത്യം
ഒന്നിനുമാവില്ല
ആയിരത്തിലധികം ദുഃഖങ്ങളെ കണ്ടറിയാന്‍
ലോകത്തെ തലമുതിര്‍ന്ന
ചിത്രകാരന്മാരുടെ കൈയ്യിലുള്ള
നൂറിലേറെ വര്‍ണ്ണങ്ങളാല്‍
ഒരുകോടി നൂറ്റെട്ടു ദുഃഖങ്ങളെ
പകര്‍ത്താനാവില്ല
വിശപ്പിനെ
ഒന്നാമത്തെ ദുഃഖമായി
ബഹുഭൂരിപക്ഷമാളുകളും അംഗീകരിച്ചിട്ടുണ്ട്.
98ാം ദുഃഖക്കാരനായ എന്നെ
1002ാം ദുഃഖക്കാരനാ ഒരാള്‍
പരിഹസിക്കുമ്പോള്‍
ഈറ പിടിക്കും

ഒരു ദുഃഖവും
വേറൊരു ദുഃഖവും തമ്മില്‍
ശണ്ഠ കൂടുന്നതിനേയാണ്
നാം ചരിത്രം എന്നു വിളിക്കുന്നത്.